Hirigunean landare hondarrak modu kontrolatuan erretzeko bandoa atera du Udalak

  Hirigunean aire zabaleko sutearen erabilera arautzea Udalari dagokio, ondoko mendian baso-sutearen arriskua saihesteko. Horren haritik, landare-hondakinak erre aurreko jakinarzpen prozedura zehaztuz, bandoa atera berri du Udalak.

  Herri lurrean landare hondarrak ezabatzeko sua piztu aurretik, udalari adierazi beharko zaio. Landare-hondakinak erretzeko jakinarazpena udal erregistro orokorrean aurkeztu beharko da, aurrez, hileko lehen asteazkenetan. Inausketetatik edota belar sastrakak garbitzetik sortutako hondakinak herriguneko lorategi eta ortuetan erre aurretik, jakinarazi egin beharko da. Idatzia betetzerakoan sua piztuko den lekuaren helbidea edo erreferentzia zehatza eman beharko da eta landare hondakinak erreko dituen horren datu pertsonalak, jakinarazpen helbidea eta harremanetarako telefono zenbakia ere eman beharko dira. Idatzia, aurrez aurre, udaletxean, HAZ bulegoan aurkeztu ahal izango da edo online, erregistro elektronikoan.

  Hirigunean landare hondarrak erre aurreko eskaeren erregistro honekin, erreketak modu kontrolatuan egin eta ondoko mendietan baso sute arriskua saihestu nahi da. Erreketa horiek guztiz debekatuta daude baso sute arrisku handiko garaian.

Iturria: Oñati Irratia