Euskara udal departamentuari dagozkion dirulaguntzetarako deialdiak argitaratu dira

  Zabalik dago Euskara udal departamentuak kudeatzen dituen dirulaguntzak eskatzeko epea. Bi laguntza lerro biltzen dituzte aurtengo deialdiek: errotuluak, irudi korporatiboa eta web gunea euskaraz jartzen dituzten entitateentzat dirulaguntzak eta euskara ikasteko dirulaguntzak.

  Baina errotulu komertziala eta webgunetarako eskabideak kartela jarri edo gunea aktibatu aurretik egin behar dira eskaerak, hizkuntza aldetik testua zuzena dela ziurtatzeko. Oñatin helbide fiskala duten pertsona fisiko edo juridikoek eta bere jarduera ekonomikoa Oñatin dauden lokaletan dutenek aurkeztu ditzakete eskaerak. Euskara ikasteko dirulaguntzak berriz, Oñatin nahiz barnetegietan euskara ikasten ari diren herritarrek eskatu ditzakete. Ikastaroaren % 85eko aprobetxamendua egiaztatzen dutenek matrikula kostuaren erdia berreskuratuko dute laguntza gisa. Era berean, bigarren ikasturtez euskara ikasten jarraitzen dutenek, % 25eko laguntza gehigarria jasoko dute jarraipen hori sarituz. Euskara ikasteko dirulaguntza, Oñatin erroldatuta daudenek eskatu dezakete.

  Aipatu bi dirulaguntza lerroetarako eskaera epea urriaren 31n itxiko da. Eskaera udaleko erregistro elektronikotik egin behar da, udal web atarian sartuta. Bateko zein besteko diru partidak batuta 9.550 euro emango dira guztira udaleko Euskara departamentuak kudeatzen dituen laguntzetan.

Iturria: Oñati Irratia