Arantzazura ibilaldia egingo da larunbatean, Elizbarrutiak antolatuta

  Elkarrekin bidean lemapean egingo da larunbatean Arantzazurako oinezko ibilaldia. Jendea Soraluze hotel parean utziko da eta autobus gutxi batzuk bertan geratuko dira, oinez igo ezin dutenak Arantzazura eramateko. Gainontzeko autobusak Ulma Handling-en aparkatuko dira, Oinezkoen ibilaldia 9:00etan abiatuko da Soraluze paretik. Santutegi aurrealdera 11:00ak inguruan iristea aurreikusten da eta otoitzaldi laburra egingo da bertan. Bitartean autobusak gorantz joango dira, jendea hartu eta etxerako bidea egiteko. Oñatiarrentzat edo Oñatira autoz datozenentzat ere autobusak izango dira Arantzazutik jaisteko. Arantzazurako errepidea 9:00etan itxiko da eta martxak gora egin ahala, irekiz joango direla jakinarazi digu udaltzainburuak.

  Komunitatea sendotu eta Aste Santurako prestaketa espiritual moduan antolatu du Donostiako elizbarrutiak larunbateko ibilaldia. Fernando Prado gotzainak gidatuko du martxa eta berak zuzenduko du amaierako otoitzaldia ere.

Iturria: Oñati Irratia