Udaleko Gizarte Zerbitzuetako artxiboa garbitu eta antolatzen ari dira

  Udaleko Gizarte Zerbitzuen departamentuan era askotako dokumentazioa kudeatzen da. Departamentuaren eguneroko funtzionamenduarekin zerikusia duten dokumentuak batetik, batzordeetako aktak, plangintzak, dirulaguntzak, hitzarmenak eta abar, eta bestetik, herritarrekin egiten diren esku-hartze guztiak.

  Zerbitzua sortu zenetik herritarren espedienteak gorde dira, bai aktibo daudenak baita bajan daudenak ere. Ondorioz, 3.294 familia espediente eta horiek sortu dituzte 4.264 herritar espediente pilatu dira. Zenbait kasutan familia bakoitzeko kide desberdinekin hainbat esku-hartze egin direlako. Guztiak gordetzeak leku arazoa sortu du Gizarte zerbitzuetako artxiboan.

  Ondareen Legearen arabera, administrazioak modu egokian gorde behar ditu berak sortzen dituen dokumentuak eta espedienteak. Esan beharrik ez dago gainera, Gizarte Zerbitzu departamenduak duen dokumentazioa bereziki zaindu beharrekoa dela, datu eta egoera oso pertsonalak, delikatuak, jasotzen baititu. Herritarrekin egiten diren esku-hartzea amaituta, baja ematen diren espedienteen trataera ere oso berezia da eta dokumentazio guztia behar bezala kudeatu behar da: zer gorde, nola gorde, noiz arte gorde eta, suntsitu behar denean, nola suntsitu ere zaindu behar da.

  Udaleko Gizarte zerbitzuetako artxiboa antolatu eta kudeatzeko oinarriak jartzeko aditu baten laguntza kontratatu zen eta hark emandako pautak jarraituz lanean ari dira jada. Hiru hilabeteko epea markatu zen hasieran, baina luzatuko dela ikusi da, lan asko baitago egiteko. Udaletxean ari den administrari bat izendatu da propio, tarteka, antolatze lan horiek egiteko

Iturria: Oñati Irratia