Zaintza sistema iraultzarako giltza dela aldarrikatuz amaitu zen martxoaren 8ko manifestazioa

2022/03/09
Card image cap
Atzoko manifestazioaren burua
Botereak eta enpresek feminismoaz egiten duten erabilera maltzurra salatu zen

  Ehunka herritarrek bat egin zuten Emakumearen egunaren harira atzo antolatu ziren mobilizazioetan. Eguerdian, pentsionista eta jubilatuak Olakuako urmaelaren inguruan elkartu ziren indarkeria matxistak hildako emakume eta haurrak omendu eta zaintza sistema publiko eta kalitatezkoa eskatzeko. Aldi berean, ikasleak, plazan elkartu ziren egungo hezkuntza sistemaren goitik beherako aldaketa eskatzeko. Baina ekintza jendetsuena arratsaldeko manifestazioa izan zen.

  Zapaltzen gaituen sistemari sua lemapean erdiguneko kaleak zeharkatu zituen manifestazioa egin zen, plazatik abiatu eta plazan amaituz. Bukaeran, Oñatiko Sare Feministako kideek hitza hartu eta sustatu nahi duten zaintza sistema egun nagusi den sistema kapitalistarekin amaitzeko giltza dela aldarrikatu zuten. Zaintza sistemaren balio iraultzailea aldarrikatu zen eta iraultza egitekotan iraultza feminista izango dela esan zuten.

  Indarrean den sistema kapitalista iraultzeko asmoa eta beharra azaldu zuten plazan bildutako ehunka herritarrek atzo ilunkaran.

Iturria: Oñati Irratia

Harpidetu boletinera

Jaso emailez Oñatiko albisteak astean behin!