Zabalik dago Gaztelekuko xake txapelketan parte hartzeko izen-ematea

  Gaztelekuko XXX. xake txapelketa izango da aurtengoa. Gaztelekuan egiten diren ekintzetan beteranoena da. Urtetik urtera jasotzen duen erantzun ona da mantentzearen arrazoia. Egutegian aldakorra den arren, urte akabera aldeko hitzordu klasikoetako bat da. Eta hasierako moduan mantentzen da, jokoa, suitzar erara, 15 minutuko 6 itzulera.

  Azaroaren 24an, 9:00tan hasiko da Gaztelekuko xake txapelketa. Edozein zalek parte hartu ahal izango du, adina eta jatorria mugatu gabe. Parte hartzeko izena eman behar da, Gaztelekuan, posta elektronikoz mezua gazteinformazioa@onati.eus helbidera bidaliz edo telefonoz, 658 725 679 zenbakira deituta. Azaroaren 20an amaituko da izena emateko epea baina plazak mugatuak dira eta izen-ematearen hurrenkeran beteko dira. Oñatiarrek doan dute izen-ematea baina gainontzekoek 5 euro ordaindu beharko dute, egunean bertan.

  8 sari banatuko dira aurten: lehenengo hirurek 200, 175 eta 150 euro eskuratuko dute, hurrenez hurren, eta Oñatiko nahiz sailkapen orokorreko lehen emakume eta gizonezko gazteek, ere sari berezi bana izango dute. Herriko lehen sailkatuarentzat ere saria izango da. Sariak ez dira batuko; sari potoloena emango da eta hutsik gelditzen dena dagokion hurrengoari emango zaio. Gazteak kategorian berriz, 18 urtera artekoak sartuko dira.

Iturria: Oñati Irratia