Pintura gorriz zikinduta agertu dira udaletxeko ate nagusia eta Gernikako arbolaren plaka oroigarria

  Goizeko 7:00ak inguruan lehen langileak udaletxera iritsi direnean eman dute gertatutakoaren abisua udaltzaingoan. Bertaratuta, plaza aldeko ate nagusia ez ezik, Gernikako arbolaren plaka oroigarria ere pinturaz zikinduta zegoela ikusi dute. Inguruetan ez dute zikindutako beste gunetik topatu baina bai ordea 25 litroko pintura potea frontoian. Ekintzaren egile edo zergatiaz galdetuta berriz, inork ez digu argibiderik eman eta harrituta azaldu dira guztiak.

  Udaletxeko ate nagusiaren eta Gernikako arbolaren plakaren kontra bota den pintura, plastika erakoa zela eta heze, lehortu gabe zegoela esan digute, baina ez dago beste argibiderik. Ingurua zaintzen duen kamerarik ez dago eta uste edo hipotesiak besterik ez daude arrazoien inguruan.

  Eskualdeko beste herrietan galdetu da Oñatikoaren pareko pintura jaurtiketarik izan ote den baina ez da halakorik egon.

  Goizeko lehen orduan garbitu dira jaurtitako pintura arrastoak, bai udaletxe ataritik eta baita plaka oroigarritik ere.

Iturria: Oñati Irratia