Oñatiko emakumion kontseiluak asanblada irekia egingo du bihar arratsaldean

  2018. urtean abiatu zen Oñatiko emakumion kontseilua eratzeko parte hartze prozesua, politika publikoetan ikuspegi feminista txertatzeko helburua oinarri, eta Oñatiko mugimendu feministaren urteetako eskaerari erantzunez. 50 emakume inguruk hartu zuen parte, 2019ra arte luzatu zen prozesuan. Hasierako dokumentu bat adostu zen eta taldeak bideari ekin zion.

  15 bat laguneko taldea hasi zen lanean, bilerak hilean behin egiten. Hiru urte hauetan gora behera ugari izan dira, pandemia, tartean. Osasun krisi betean taldea astean behin biltzera iritsi zen eta pandemia garaiko erabaki gune estrategikoetan eragin zuen.

  Kide batzuk joan, beste batzuk etorri, taldeak nolabaiteko egonkortasun eta definizioa lortu du. 2022ko udaberrian, martxan zegoen ekimena formalizatzeko beharra jarri zen mahai gainean eta urriaren 27ko Osoko Bilkurak behin behinekoz onartu zuen Oñatiko Emakumion kontseiluaren eraketa eta funtzionamendua arautzeko testua.

  Biharko asanblada irekian kontseiluak orain arte eginiko bidea eta kontseiluaren formalizazioan emandako urratsak azalduko dira, kontseiluan parte hartzeko irizpideak eta prozedurak argitu dira, eta datorren urterako erronkak finkatuko dira. Asanblada udaletxeko areto nagusian egingo da, 18:00etan, eta interesa duten herritar guztiak gonbidatzen dira.

Iturria:Oñati Irratia