Neguko Prebentzio Plana gertu du Udalak

  Neguko lehen denboralea iragarri du Euskalmetek datorren asterako. Igandean haizea ipar mendebalera aldatuko da eta aire masa hotza sartzen joango da, arratsaldean elur-kota 1000 metro ingurura jaitsi daitekeelarik. Hortik aurrera, prezipitazio ugaria eta elur maila gehiago jaistea aurreikusi da baina zehaztapenik ez da eman oraindik.

  Elurra 400 metrora jaistean sartu ohi da indarrean udalaren elur protokoloa baina hori zehazten duen prebentzio plana iazko azarotik zehaztuta dago. Lau udal teknikari izendatuta daude unean uneko beharren araberako baliabide tekniko eta pertsonalak lanean jartzeko. Pertsonal aldetik, lau tekniko horiezaz gain, kale garbitzaileak, udal brigadako langileak eta lorezaintza lanetan dihardutenak aipatu behar dira. Lorezaintza enpresarekin hitzarmena baitauka udalak, elurra eginez gero garbitze lanetan lagundu dezaten. Baliabide material aldetik, traktorea eta hiru pick-up ditu Udalak eta elurra kentzeko palak edota gatza botatzeko elementuak jartzeko moduan daude. Kaleak garbitzeko berriz, eskuz maneiatu daitezken motordun pala-makinak nahiz motor gabeko gailuak ditu udalak.

  Neguko protokoloan, makinen erabilpen ardura ez ezik, eremua ere zehaztuta dago. Herria, lau zatitan banatuta dago eta bakoitzak zein gune garbitu behar duen izendatuta dago. zerbitzuen koordinazioaz propio izendatutako teknikoak arduratuko dira eta herritarren abisu eta deiak Udaltzaingoan zentralizatuko dira. Astegunetako beharra ez ezik, asteburuan sortu daitezkeenak zainduko dira, teknikoek, binaka, guardia-egutegia beteko baitute.

  Gatza ere sobera dago. Aurreko urteetan ez da gatz behar handirik izan eta urte amaieran beste 25 tona ekarri ziren, badaezpada. Udal biltegia beteta dago, tamaina ezberdineko zakutan biltzen den gatzaz, beharraren arabera erabili ahal izateko.

  Baliabide tekniko eta pertsonalak gertu daude eta lanerako plangintza ere eginda. Orain, eguraldi iragarpenak jarraitu behako dira.

Iturria: Oñati Irratia