Familia turismoaren alde egiten jarraitzen dute herriko turismo eragileek

  Zazpi plan Gipuzkoa barnealdean, oporraldi segurua natur ingurunean leloa du udarako antolatu den turismo eskaintza zabalak. Herrian dauden turismo baliabide ezberdinak uztartuz, hiru gune nagusitan 7 plan berezi eskainiko dira: Turismo bulegoa eta Txokolateixia, erdigune historikoan; Arrikrutz-Oñatiko kobak, Pottokaleku eta Gomiztegi baserria natur ingurunean, eta Santutegia eta Parketxea beti erakargarri den Arantzazun. Batera zein bestera doazen bisitariak batuta, urtean 17.000 lagun etortzen dira Oñatira. Eta asko familia giroan. Horiek bereziki kontuan hartu dira aurten ere, turismo eskaintza zehazterakoan.

  Txokolateixan egunero egogo da bisita gidatuak egiteko aukera, aurrez erreserba eginez gero. Arrikrutzeko koba ere egunero irekiko da eta uztailaren 17, 23 eta 31n eta abuztuko lau larunbatetan, Espeleotxiki irteerak egingo dira. Gainera, uztailaren 30ean eta abuztuaren 7an 18 urtez gorakoei zuzendutako EspeleoArrikrutz bisitak ere egingo dira, 15:30n. Turismo bulegoko teknikarien eskutik, uztaileko asteburu eta jaiegunetan eta abuztuan, egunero, Oñatiko altxorrak bisita gidatua egingo da 13:00tan, Sancti Spiritus unibertsitatea eta Mikel Goiaingeruaren parrokia ikusiz. Arantzazuko Gomiztegi baserrian eta Pottokalekun ere bisita gidatuak egin ahal izango dira, erreserbapean. Arantzazun, azkenik, Parketxeak antolatutako bisita bereziak eta orientazio jolasak tartekatuko dira uztaila eta abuztuko egunetan eta Santutegia, gida batez lagunduta, egunero bisitatu ahal izango da, 10:30tan eta 15.30tan, euskaraz, eta 12:30tan eta 17:00tan, gazteleraz.

  Gure hizkuntza, euskara, bada bisitariek ere preziatzen duten beste altxor bat eta hori gogoan UEMAren Bertatik bertara kanpainarekin bat egin du berriro Udalak, orain egun batzuk dela aurreratu genuenez. Euskaraz eta euskararekin gozatzera animatu nahi ditu bisitariak. Hainbat material eta euskarri erabiliko da horretarako, besteak beste, euskarazko oinarrizko hiztegitxoa daramaten mahai gainekoak.

  Ostalariak agente aktibo izatera gonbidatu dira beste behin, eurak direlako sarritan herriko informazioa ematen lehenak. Eta lehen hitz hori euskaraz egitea eta eguneko menua euskaraz idatzita eskaintzera animatu dituzte udaleko Euskara eta Turismo departamentuetatik.

Iturria: Oñati Irratia