Domeka goizaldean ordua aldatuko da, ordua atzeratu egingo da

  Urtean zehar egiten diren bi ordu aldaketen bigarrena gauzatuko da asteburuan, zapatutik domekarako gauean. Domekan, goizaldeko 3:00etan erlojuak ordubetez atzeratu eta berriro 2:00tan jarri beharko dira. Aldaketa honekin, domekak ordubete gehiago izango du, 25 orduko eguna izango da. Ordu aldaketa honekin martxo amaierara arte luzatuko den neguko ordutegia sartuko da indarrean.

  2018an ordu aldaketa gehiagorik ez egitea proposatu zuen Finlandiak eta Europako Batzordeak hala erabaki zuen. Hasieran 2019ko martxoa zehaztu zen azken aldaketarako data gisa baina 2021era atzeratu zen, herrialde bakoitzak zein ordutegi jarri aukeratu zezan, hau da, eguzkiarekiko bi orduko aldea duen udakoa ala ordu bakarrera mugatzen duen negukoa mantendu. Covid-19ak balizko eztabaida hori eten zuen eta zaila da ordua ez aldatzeko gaiari berriro noiz helduko zaion esatea.

  Gauzak horrela, asteburuan neguko ordutegia berreskuratuko dugu berriro eta domeka goizaldean ordulariak atzeratu eta 3:00etan 2:00tan jarri beharko ditugu.

Iturria:Oñati Irratia