Beasain-Bergara errepideko bidesariari buruzko informazioa Oñatin emango du Aldundiak

Urtarrilaren 18an sartu zen indarrean Beasain eta Bergara arteko A-636 errepideko bidesaria. Horren harira, informazio kanpaina abiatu zuen Foru Aldundiak, bereziki autobia horretatik hurbil dauden eta teleordainketarako gailurik ez duten biztanleei zuzenduta. Kanpainaren helburua da erabiltzaileen zalantzak argitu, erabiltzaileek Abiatu gailua eskatu ahal izatea eta beren ibilgailuaren matrikula banku-txartel batekin lotzeko aukera aurrez aurre ematea.
Martxoaren 31ra arte luzatu da errepideko bidesariari buruzko aurrez aurreko zerbitzua eta Oñatin ere eskainiko da martxoaren 9an eta 28an. Zubikoa kiroldegiko bilera gelan eskainiko da informazioa, 9:30tatik 13:30tara eta 16:00etatik 20:00etara. Tarifei, deskontuei edo teleordainketa sistemari buruzko informazioa eta eskaera inprimakiak jaso ahal izango da bertan.
Iturria: Oñati Irratia

Harpidetu boletinera
Jaso emailez Oñatiko albisteak astean behin!