Erorikoak saihesteko lau orduko tailer berria antolatu da apirilaren 18 eta 20rako

64 urtetik gorakoen artean erorikoak izan ohi dira lesio eragile nagusiak EAEn. Datu epidemiologikoen arabera, gutxienez urtean behin erortzen dira talde horretako pertsonen erdiak; eta ondorio fisikoak ez ezik, psikologiko eta sozioekonomikoak ere izaten dituzte. Arazoaren garrantzia kontutan hartuta, erorikoak saihesteko tailerrak antolatzeari ekin zion Udalak, osasun arduradunekin batera, eta halako hurrengo tailer teoriko-praktikoa apirilaren 18 eta 20rako antolatu da.
Erorikoak saihesteko tailer hau pertsona nagusiei eta euren senide edota zaintzaileei zuzenduta dago. Tailerra Zubikoa kiroldegian izango da eta bi saio teoriko-praktiko egingo dira, apirilaren 18 eta 20an, 16:00etatik 18:00etara.
Saio hauetan hainbat gai azalduko dira: erorikoak zergatik gertatzen diren eta zer egin daitekeen aurre hartu edo prebenitzeko; zer garrantzitsuak diren, honetan ere, ohitura osasungarriak izan eta ariketa fisikoa egitea; edota nolako laguntza teknikoak dauden eskuragarri, telelaguntza esaterako. Ariketa praktikoak ere egingo dira nola erori eta erori ondoren nola jaiki ikasteko.
Erorikoak saihesteko lau orduko tailer honetan parte hartzeko izena eman behar da anbulatorioan edo bertara telefonoz deituta: 943 03 54 30 zenbakira. Tailerra doan da baina plazak mugatuak dira. Aurretik egin diren era honetako tailerretan, taldeak oso azkar bete dira.
Hainbat erakundek bat egin dute erorketen prebentziorako tailer honen antolakuntzan: Udaleko Ongizate zerbitzuak eta Kirol departamentuak, batetik, osasun zentroak eta Eusko Jaurlaritzako Osasun saila, bestetik, eta herriko farmazia-ortopedia bat ere bai. Helburua, ahal den neurrian, erorikoen kopurua gutxitzea da.
Iturria: Oñati Irratia

Harpidetu boletinera
Jaso emailez Oñatiko albisteak astean behin!