Trakzio mekanikodun ibilgailuen gaineko zergaren kobrantza hasi da gaur

2018/03/01
Zirkulazio zerga moduan ezagutzen dena ordaintzeko borondatezko epea apirilaren 25ean amaituko da

  862 mila euroko sarrera izango du aurten udalak trakzio mekanikodun ibilgailuei aplikatu ohi zaien zerga kontzeptuan. Iaz baino 5 mila euro gehiago. Oñatin ibilgailuen erroldan 7650 ibilgailu daude une honetan, iaz baino 142 gehiago. Kopuru horretan, ohiko turismoz gain, kamioiak, autobusak, motorrak eta ziklomotoreak sartzen dira. Baita, zirkulazio zerga ordaintzetik kanpo geratzen diren nekazaritzako ibilgailu, erremolke txiki eta ezinduen jabetzapekoak diren ibilgailuak ere.

  Zerga ordaintzetik salbuetsita dauden ibilgailuak 877 dira, iaz baino 110 gehiago. Azken urtean asko hazi dira 25 urte baino antzinatasun handiagoa duten ibilgailuak, 200 gehiago zenbatu dira. Horrek diru bilketan eragina izango du, trakzio mekanikodun ibilgailuen gaineko zerga ordaintzetik salbuetsita baitaude. Ibilgailu hauen jabeek, ez gaitu edo minusbalido txartela duten ibilgailu jabeen antzera, zerga agiria jaso-jasoko dute baina ordaindu beharreko kopuruaren atalean 0 euro agertuko da. 

  Iaz bezala, aurten ere, familia ugariek hobaria jasoko dute ibilgailuen zerga honetan. Konkretuki 124 familiari aplikatuko zaie %15eko hobari orokorra. Hortik gora, errenta nahiz seme-alaben kopuruaren arabera hobaria handiagoa izan liteke baina hala jaso beharko luketeela uste duten familia ugariek, eskaera berria egin beharko dute errenta kanpaina amaitu ondoren, uztailean. Familia ugaria izaki hobari hau aplikatzeko eskaera egin ez duenak ere, udal bulegoetatik pasata eskatu dezake.

  Motordun ibilgailuren baten jabe diren guztiek datozen egunotan jasoko dute zirkulazio zerga ordaintzeko erreziboa. Ordainketa helbideratuta duten ia 6000 ibilgailuen jabeei kargua astelehenean, martxoaren 5ean egingo zaie eta ordainketa jakinerazpena euren aurrezki kutxa edo banketxetik bidaliko zaie. Gainontzeko jabeek, udaleko jakinerazpena zuzenean jasoko dute eta dagokien ordainketa udal bulegoetan egin beharko dute. Trakzio mekanikodun ibilgailuen udal zerga ordaintzeko borondatezko epea hilabete eta erdiz luzatuko da, apirilaren 25era arte. Ordainketa epez kanpo egiten dutenei zigor ekonomikoa jarriko zaie.

Iturria: Oñati Irratia